SALTOS CON CORDA

 Ao longo de varias sesións os alumnos e alumnas de 4º de Primaria fostes aprendendo e practicando unha serie de saltos con corda, tanto a nivel individual como en grupos. Nalgúns deles incorporastes un toque persoal, froito da vosa creatividade. Un gran traballo o realizado por todos vós, especialmente por aqueles e aquelas aos que máis vos custou, pero que con esforzo e interese fostes superando esas pequenas dificultades iniciais.  

VISITA CLUB HOCKEY CAMBRE

 Nesta semana tivemos a visita ao centro de 2 integrantes do Club Hockey Cambre. Explicáronlles ao alumnado unhas nocións básicas sobre este deporte. A cativada quedou encantada coa experiencia. 

EDUCACIÓN EMOCIONAL NO DEPORTE. EXPRESIÓN CORPORAL.

Ao longo de varias sesións estivemos traballando a educación emocional. Tratábase de que os alumnos/as foran conscientes das súas propias emocións, tanto positivas como negativas, que se dan moitas veces durante a práctica deportiva. Pero tamén ser capaces de recoñecelas nos demais, poñéndose no lugar dos compañeiros/as. 

Por medio dunhas situacións ficticias, déuselles aos rapaces e rapazas a consigna de que reaccionaran tal e como lles pedía o seu corpo e a súa mente, con total liberdade, tanto ante as emocións positivas como negativas, pero seguindo uns parámetros básicos de boa conduta.  

Este foi o resultado obtido. 

BENVIDOS AO GRANDIOSO CIRCO DO GRAXAL

Chegou o día! Despois de varias semanas na que os artistas estiveron preparando as súas magníficas funcións, fomos quen de unir todas para crear este espectáculo que cremos que é único. Quixemos manter a maior parte dos vídeos tal e como nolos enviastes, conservando a vosa elaboración basada nun gran sentido de esforzo e nunha gran dose de creatividade e orixinalidade. Naqueles vídeos nos que non había música de fondo fixemos uns pequenos retoques que esperemos sexan do agrado de todos/as.

Agardamos que desfrutedes do espectáculo tanto coma nós. Os profes de Educación Física queremos darvos as grazas polo voso esforzo e implicación. E queremos rematar este curso desta maneira, con alegría, con entusiasmo, con esperanza, con ilusión... De aí a idea de crear este circo, para finalizar o curso de Educación Física con bo sabor de boca. Non hai mellor terapia que facerlle fronte aos momentos delicados e difíciles que nos toca vivir cunha gran dose de humor e alegría.

VIVA O CIRCO DO GRAXAL!!

QUE COMECE O ESPECTÁCULO!!

Entrada para o CIRCO do GRAXAL

Todo circo, antes de iniciar a súa primeira función, ten que realizar unha serie de preparativos: montar o escenario coa súa gran carpa central, realizar ensaios previos sobre como serán as funcións a representar, anunciar por megafonía en furgoneta ou coche que o circo xa chegou á vila ou cidade, repartir tickets con desconto polos diferentes negocios da zona, colgar os carteis nas farolas e nos escaparates das tendas… Un sinfín de traballos que a maior parte das veces non caemos na conta e que son fundamentais para que o circo teña máis ou menos éxito.

Pois queremos que saibades que o circo xa chegou á zona do Graxal e os seus diferentes artistas estanse a preparar para deleitarvos co seu fantástico e inigualable espectáculo. Iso será dentro duns días, pero tranquilos que avisaremos por mensaxería o día que vaia empezar o espectáculo. Mentres tanto seguimos con eses preparativos que todo circo precisa antes de representar as súas funcións ao público.

Polo de pronto, quédanvos aquí as entradas e o cartel anunciador, por cortesía da familia Varela Castro. Non te quedes sen a túa entrada.

VIVA O CIRCO DO GRAXAL!

Anuncio

O marabilloso Circo do Graxal está a piques de abrir o seu telón para contemplar as fantásticas actuacións dos malabaristas, magos, domadores, acróbatas, forzudos, majorettes, pallasos… Unha gran variedade de artistas que vos deleitarán coas súas incribles actuacións. Un gran espectáculo que non podes perderte. Nuns días comezará a súa primeira función.

Se todavía queres participar aínda estás a tempo. É unha oportunidade única de demostrar as túas habilidades circenses. ÁNIMO!

A idea de montar un circo: O circo do Graxal

Ola nenos/as do CEIP Plurilingüe Graxal. A bo seguro que hoxe quedastes estrañados ao ver que non subimos ningún xogo novo. Deixamos de recibir novas propostas de xogos polo que queremos poñer fin a esta dinámica de traballo e iniciar así un novo proxecto. Cremos que esta iniciativa tivo moi boa acollida e acadou un gran éxito, así que recibide os nosos parabéns. Contribuístes a compartir eses xogos que fixestes nas vosas casas ao longo destas semanas e fixestes que outros alumnos/as do cole puidesen practicar os xogos que inventarades. Aparte de compartir as vosas experiencias lúdicas fostes conscientes de que con moi poucas cousas pódense realizar xogos moi entretidos e divertidos. Tan só fai falta imaxinación e creatividade, calidades que todo neno/a posúe; tan só temos que crear os estímulos adecuados para impulsalas. 

E así adentrámonos nunha nova proposta. A bo seguro que moitos de vós, nas primeiras semanas de confinamento, seguistes en directo as actuacións do Circo do Sol que se emitiron por YouTube. Pois queremos crear o noso circo particular, que lle chamaremos o Circo do Graxal. Nun circo aparecen gran variedade de habilidades: equilibrios, saltos, xiros, coordinación, lanzamentos e recepcións... Podedes representar aos artistas que máis vos gusten ou que mellor se vos den: equilibristas e funambulistas, paiasos, acróbatas, domadores, malabaristas...

Tan só nos teredes que enviar un vídeo coa vosa actuación ao correo electrónico: efnacasa@gmail.com para finalmente realizar nós unha montaxe con todas as vosas aportacións e poñer fin así ao curso 2019-20.

Detallamos a continuación os requisitos de participación:

- O vídeo non pode durar máis de 30 segundos. Nese tempo representaredes ao voso personaxe escollido. Por exemplo, se quero facer de malabarista podo usar 2 ou 3 bólas e gravarme facendo malabares. 

- A data límite será o martes 2 de xuño. Dispoñedes, polo tanto, de 3 semanas. 

Este proxecto, ao igual que sucede cos retos e tamén sucedeu cos xogos inventados por vós, será novamente de participación voluntaria. A nosa ilusión é que participedes o maior número de alumnos/as xa que así o espectáculo final será máis grandioso e marabilloso, pero entendemos que podedes estar saturados de proxectos e tarefas escolares polo que queremos que a decisión final a tomedes vós libremente. 

QUE EMPECE O ESPECTÁCULO POIS!