Chegou o día! Despois de varias semanas na que os artistas estiveron preparando as súas magníficas funcións, fomos quen de unir todas para crear este espectáculo que cremos que é único. Quixemos manter a maior parte dos vídeos tal e como nolos enviastes, conservando a vosa elaboración basada nun gran sentido de esforzo e nunha gran dose de creatividade e orixinalidade. Naqueles vídeos nos que non había música de fondo fixemos uns pequenos retoques que esperemos sexan do agrado de todos/as.
Agardamos que desfrutedes do espectáculo tanto coma nós. Os profes de Educación Física queremos darvos as grazas polo voso esforzo e implicación. E queremos rematar este curso desta maneira, con alegría, con entusiasmo, con esperanza, con ilusión... De aí a idea de crear este circo, para finalizar o curso de Educación Física con bo sabor de boca. Non hai mellor terapia que facerlle fronte aos momentos delicados e difíciles que nos toca vivir cunha gran dose de humor e alegría.
Todo circo, antes de iniciar a súa primeira función, ten que realizar unha serie de preparativos: montar o escenario coa súa gran carpa central, realizar ensaios previos sobre como serán as funcións a representar, anunciar por megafonía en furgoneta ou coche que o circo xa chegou á vila ou cidade, repartir tickets con desconto polos diferentes negocios da zona, colgar os carteis nas farolas e nos escaparates das tendas… Un sinfín de traballos que a maior parte das veces non caemos na conta e que son fundamentais para que o circo teña máis ou menos éxito.
Pois queremos que saibades que o circo xa chegou á zona do Graxal e os seus diferentes artistas estanse a preparar para deleitarvos co seu fantástico e inigualable espectáculo. Iso será dentro duns días, pero tranquilos que avisaremos por mensaxería o día que vaia empezar o espectáculo. Mentres tanto seguimos con eses preparativos que todo circo precisa antes de representar as súas funcións ao público.
Polo de pronto, quédanvos aquí as entradas e o cartel anunciador, por cortesía da familia Varela Castro. Non te quedes sen a túa entrada.
O marabilloso Circo do Graxal está a piques de abrir o seu telón para contemplar as fantásticas actuacións dos malabaristas, magos, domadores, acróbatas, forzudos, majorettes, pallasos… Unha gran variedade de artistas que vos deleitarán coas súas incribles actuacións. Un gran espectáculo que non podes perderte. Nuns días comezará a súa primeira función.
Se todavía queres participar aínda estás a tempo. É unha oportunidade única de demostrar as túas habilidades circenses. ÁNIMO!
Ola nenos/as do CEIP Plurilingüe Graxal. A bo seguro que hoxe quedastes estrañados ao ver que non subimos ningún xogo novo. Deixamos de recibir novas propostas de xogos polo que queremos poñer fin a esta dinámica de traballo e iniciar así un novo proxecto. Cremos que esta iniciativa tivo moi boa acollida e acadou un gran éxito, así que recibide os nosos parabéns. Contribuístes a compartir eses xogos que fixestes nas vosas casas ao longo destas semanas e fixestes que outros alumnos/as do cole puidesen practicar os xogos que inventarades. Aparte de compartir as vosas experiencias lúdicas fostes conscientes de que con moi poucas cousas pódense realizar xogos moi entretidos e divertidos. Tan só fai falta imaxinación e creatividade, calidades que todo neno/a posúe; tan só temos que crear os estímulos adecuados para impulsalas.
E así adentrámonos nunha nova proposta. A bo seguro que moitos de vós, nas primeiras semanas de confinamento, seguistes en directo as actuacións do Circo do Sol que se emitiron por YouTube. Pois queremos crear o noso circo particular, que lle chamaremos o Circo do Graxal. Nun circo aparecen gran variedade de habilidades: equilibrios, saltos, xiros, coordinación, lanzamentos e recepcións... Podedes representar aos artistas que máis vos gusten ou que mellor se vos den: equilibristas e funambulistas, paiasos, acróbatas, domadores, malabaristas...
Tan só nos teredes que enviar un vídeo coa vosa actuación ao correo electrónico: efnacasa@gmail.com para finalmente realizar nós unha montaxe con todas as vosas aportacións e poñer fin así ao curso 2019-20.
Detallamos a continuación os requisitos de participación:
- O vídeo non pode durar máis de 30 segundos. Nese tempo representaredes ao voso personaxe escollido. Por exemplo, se quero facer de malabarista podo usar 2 ou 3 bólas e gravarme facendo malabares.
- A data límite será o martes 2 de xuño. Dispoñedes, polo tanto, de 3 semanas.
Este proxecto, ao igual que sucede cos retos e tamén sucedeu cos xogos inventados por vós, será novamente de participación voluntaria. A nosa ilusión é que participedes o maior número de alumnos/as xa que así o espectáculo final será máis grandioso e marabilloso, pero entendemos que podedes estar saturados de proxectos e tarefas escolares polo que queremos que a decisión final a tomedes vós libremente.
Seguimos coas modalidades olímpicas e nesta ocasión Olivia explícanos como xogar na casa ao tenis de mesa, deporte que tamén é coñecido como ping-pong. Xa vedes que non fan falta raquetas, unicamente precisamos unha bóla. Se queredes aumentar a dificultade practicade cunha pelota saltarina, se a tedes por casa, senón serve calquera pelota pequena e lixeira. Iso si, tede coidado coas figuras, cadros, televisor, fiestras... non vaia ser que vos caia unha boa rifa por parte dos vosos pais. Non rompades nada non vaia ser que nos pasen a nós os posibles gastos, jeje! Así que xa sabedes; con moito coidadiño e con moito sentidiño.
Para completar máis información sobre o tenis de mesa podedes consultar este enlace.
Empezamos a semana cunha nova modalidade olímpica: a ximnasia artística. Rodas laterais, pinchacarneiros, pino ponte, posición invertida, spagat… Un sinfín de habilidades para as que se require ante todo moi boa flexibilidade e control postural. Veredes aquí algunas das habilidade que practican Paula e Noa na súa casa, con efectos especiais e todo. As Nadia Comaneci ou Simona Biles do futuro!!
Se queredes ampliar máis información acerca deste deporte, quédavos aquí este enlace.
Os irmáns Álvaro e Miguel preséntannos hoxe este impresionante circuíto que crearon eles na súa casa e que lles permite practicar habilidades motrices básicas como os desprazamentos ou os saltos.
Os circuítos son un recurso que dan moito xogo, xa que podemos adaptalos en función das habilidades que queiramos practicar. Animádevos a crear o voso percorrido particular no que mesturedes xiros, saltos, lanzamentos, carreiras… A bo seguro que algún de vós xa usou a vasoira para facer equilibrios, ou cartóns de leite para saltar por enriba, ou tapóns para lanzar e encestar nunha garrafa. Veredes que divertido vos resultará; ademais de que estaredes fomentando a vosa imaxinación e creatividade. ÁNIMO!!
Sesión 30. Circuíto de habilidades motrices básicas
Sabedes cal é o produto de droguería que vai pasar á historia como o máis recordado da época do coronavirus? Efectivamente, o papel hixiénico! Pois as irmáns Ainhoa e Antía explícanvos como utilízalo en parella para traballar a coordinación máis os abdominais. Un xogo moi apropiado para familias que conten con dous irmáns/irmás ou máis. E senón, se sodes fillos/as únicos, non pasa nada, porque o poderedes practicar con papá, mamá, avó, avoa… ÁNIMO!!
Nerea preséntanos este fantástico xogo de puntería que creou ela mesma. Pode semellar ao típico xogo da diana, pero xa vedes que dun xeito máis artesanal; en vez de diana hai vasos con furados e no lugar de dardos hai pelotas de papel. Unha demostración máis de que non fai falta gran material para poder inventar un xogo co que a bo seguro pasaredes un rato moi divertido. Así que... xa sabedes... a afinar esa puntería e a ver quen ten máis precisión nos lanzamentos. A puntuación final dependerá do tino que teñades.
Que tal estades rapaces/rapazas? Supoñemos que quen máis e quen menos xa puido dar máis dun paseo estes últimos días e poder desfrutar, aínda que fose un pouquiño, coas bicis, patinetes, patíns… Que gusto poder recuperar praceres que antes pasaban máis desapercibidos: que nos dé o sol na cara mentres camiñamos, dar un paseo coa bicicleta, sentir dunha maneira máis profunda o aire que respiramos, escoitar o canto dos paxariños... En fin, sensacións agradables sobre as que apenas nos parabamos a pensar hai dous meses, antes de que aparecese o virus.
É unha forma de ir recuperando pouco a pouco a normalidade, pero lembrade que é fundamental que sexamos todos/as responsables e que sigamos as normas e horarios de saídas polo ben común.
Iniciamos unha nova semana con novos xogos que nos traen alumnos/as do noso colexio. No día de hoxe, retomamos a temática de xogos populares e tradicionais. Gabriel explícanos como xoga aos bolos na súa casa. Xa vedes que non fai falta moito material; soamente hai que afinar puntería e... a ver se conseguides pleno coma Gabriel. Todo un crack!!
E xa sabedes! A seguir enviando novos xogos creados ou inventados a partir da vosa imaxinación e da vosa creatividade para compartir as vosas aprendizaxes co resto do alumnado. Lembramos o correo: efnacasa@gmail.com Que a cabeza non pare de pensar!
Sesión 27. Xogos populares e tradicionais: os bolos.
Último xogo que subimos por esta semana e hoxe contamos coa colaboración dos irmáns Rubén e Diego Barbazán quen nos traen unha nova modalidade de baloncesto: o basket tapper. Un xogo cunhas regras moi claras e precisas e que a bo seguro fará que pasedes un momento moi agradable e divertido. A nós, desde logo, encantounos.
Vémonos novamente para a vindeira semana. Seguide mandando as vosas fabulosas ideas para que poidan ser compartidas co resto do alumnado.
Rematamos co lema: "Un día máis, un día menos". MOITO ÁNIMO!!
Novamente contamos coa colaboración de Mara quen vos explicará como practicar este xogo popular e tradicional, pero cunha pequena adaptación. Non, non ides xogar en posición estática. Esta modalidade require que sexades moi rápidos e veloces para colocar as fichas antes que o adversario e conseguir que 3 das vosas fichas queden en liña. Un xogo para practicar en familia.
Incluso se pode facer en modo cooperativo-competitivo, por equipos. Modalidade que xa practicamos no colexio nas sesións de Educación Física.
Para a sesión de hoxe Olivia preséntanos un xogo de pilla. Pensaredes que teremos que correr por toda a casa e escapar de alguén, pero non. Non vaia ser que choquemos cunha porta, ou tiremos a sartén, ou tropecemos cunha mesa... Xogos de pilla dentro da casa coma que non.
Este xogo é unha adaptación con material. Precisades un taboleiro e unhas bólas (diferente a do lobo respecto ás das ovelliñas). Ademais ten a vantaxe de que é un xogo cooperativo, onde os movementos dos xogadores deberán ser coordinados e sincronizados para salvar ao maior número de ovellas.
Comezamos unha nova semana, seguro que algo máis aliviados por poder saír de casa como máximo unha hora ao día, pero tendo sempre en consideración os consellos que tanto escoitariades este fin de semana tanto nos medios de comunicación coma por parte da vosa familia para previr futuros contaxios.
Na sesión de hoxe Mara de 1ºA fai unha explicación completísima de como poder usar a bicicleta na casa. Como a maior parte do día seguiremos confinados na casa, esta pode ser unha moi boa opción para practicar coa bicicleta. Moitas grazas Mara por compartir esta idea tan orixinal co resto do alumnado.
Ao final do vídeo animámosvos a que nos enviedes os vosos vídeos montados na bicicleta para ver se somos quen de pillar a Mara.
Queda aquí tamén un enlace por se queredes saber algo máis deste deporte tan interesante.
Retomamos a temática dos deportes olímpicos da man de Martín (3ºB) e Elisa (3ºA). O deporte que nos presentan é o golf.
Como xa saberedes, para a súa práctica precisamos paus, pelotas e buratos e o máis interesante disto é que veredes como cada un empregou diferentes obxectos que tiñan por casa para representar aos mesmos, o que demostra unha vez máis que a creatividade e a imaxinación non teñen límites. Mesma idea pero cada un coa súa modalidade particular. Fantástico!!
Queda aquí tamén un enlace por se queredes saber máis sobre este deporte.
Piero quere compartir con vós este interesante xogo que mestura coordinación, desprazamentos, precisión, velocidade, percepción espacial… Un xogo familiar moi completo que a bo seguro provocará máis dunha risa entre os participantes.
Lembrade que se non tedes ese material en concreto sempre poderedes facer adaptacións coas cousas que teñades por casa.
Aproveitamos o momento para seguir animándovos a que enviedes xogos para compartir cos demais. Todos/as queremos ver como segue fluíndo a vosa creatividade e a vosa imaxinación. ÁNIMO!!
Para a sesión de hoxe 3 alumnos (Alonso, Ainhoa e Antía) explicarannos como practicar habilidades empregando rollos de papel hixiénico. Agora entendemos por que este produto converteuse nun elemento moi codiciado nos primeiros días de confinamento e que escaseaba ou desaparecía dos supermercados nun abrir e pechar de ollos. Non era para limpar o cu; era para practicar habilidades con eles. Tivo que vir o coronavirus para descubrir unha nova utilidade do papel hixiénico. Pois veña, a ver que tal está esa flexibilidade. A practicar. Ánimo!!
Sesión 20. Habilidades con rollos de papel hixiénico
No día de hoxe Ariana e Martina queren compartir con tod@s vós un xogo que están practicando moito na súa casa e que lle chamaron "A pelota no aire". Este vídeo poderiamolo incluír perfectamente dentro da sección de "Deportes olímpicos: tenis de mesa ou tenis".
Sen dúbida unha idea moi creativa e que vai dar moito xogo. Parabéns!!
Animámosvos a tod@s a seguir enviando vídeos cos xogos que practicades na casa e que queirades compartir co resto do alumnado do colexio. Lembrade que tan só teredes que explicar que material usades e as regras do xogo.
COMPARTAMOS O NOSO COÑECEMENTO PARA AMPLIAR AS NOSAS APRENDIZAXES
Esta semana que empezamos decidimos cambiar a metodoloxía, a forma de presentar os xogos. Agora que xa coñecedes a dinámica, queremos que vós, os alumn@s, teñades un maior protagonismo e por iso propoñemos a idea de que sexades vós os que elaboredes os vídeos cos xogos que inventedes para compartir co resto do alumnado do colexio.
Simplemente tedes que gravar un vídeo onde apareza explicado o material a utilizar (lembrade que teñen que ser cousas que todo o mundo ou case todo o mundo teña por casa) así como as regras do xogo. Facedes unha demostración e listo!! Enviádelo ao correo efnacasa@gmail.com e intentaremos subilo ao blog de Educación Física.
Xa vos adiantamos que cos retos semanais faremos o mesmo. Este mércores xa será un alumn@ do cole o que vos plantexará o reto. Engadiremos nova información no apartado retos en Educación Física da páxina web do cole.
Pois sen nada máis que contar, deixámosvos aquí cos xogos inventados por Gabriel de Río de 3ºA.
Xogo de lanzamentos no que haberá que ter precisión para mover un obxecto cara a metade do campo contrario. O que demostre ter mellor puntería terá moitos boletos para saír como gañador/a da partida.
Como poder adaptar o xogo tradicional e popular da petanca a un espazo tan reducido como pode ser o noso piso? Pois como con todo, dándolle ao coco e buscando solucións.
As pequenas adaptacións que faremos terán que ver co material a empregar. Se dispoñemos dun espazo exterior non teremos tanto problema e poderemos utilizar pelotas, pero se o espazo é pequeno e reducido podemos usar unhas pinzas da roupa en vez de bolas e un garavanzo en lugar do boliche, que é a bola máis pequeniña do xogo e a que decide quen gaña a partida, xa que o xogador/a que teña máis próxima a súa bola ao boliche será o vencedor/a.
Neste xogo teredes que estar moi concentrados e retirar as mans antes de que sexan golpeadas polo contrario. Tres intentos. Retade a algún familiar. Quen terá máis reflexos?
Rematadas as vacacións máis estrañas da nosa vida, chegou o momento de empezar o terceiro trimestre. Así que moito ÁNIMO, moita ENERXÍA, e sobre todo moita SAÚDE. Que desta situación imos saír máis fortalecidos ca nunca.
Inicialmente vou empezar este trimestre na mesma liña que rematamos o anterior, subindo vídeos para practicar na casa unha serie de habilidades e destrezas e desenvolvendo a creatividade que todo ser humano leva consigo e que moitas veces está oculta. Trátase de que pasedes polo menos un rato agradable e entretido, e nalgúns casos con máis dun sorriso na boca.
Enviádeme cantas fotos e vídeos queirades ao correo electrónico efnacasa@gmail.com porque para min é unha forma de sentirvos máis cerca e de comprobar que estades ben.
Hoxe preséntovos un xogo que chamei "pescando peixes". É un xogo de puntería, pero sobre todo de habilidade, xa que comprobaredes que non é tan doado conseguir que o bote quede boca abaixo unha vez o lancedes para atrapar aos peixes (bolas de papel).
Hoxe explícovos como xogar ao baloncesto con tapóns ou chapas. Trátase dun xogo de estratexia, e de certa dificultade, xa que son moitas as regras que hai que adaptar para poder xogar con estes materiais tan sorprendentes: tapóns, rollos de papel hixiénico e un garavanzo.
En primeiro lugar teredes que elaborar as equipacions das seleccións que van xogar o partido. Aquí tedes este enlace para ver como foron as camisetas e que xogadores participaron no Mundial de China de 2019.
Despois teredes que delimitar ben o terreo de xogo. No vídeo comprobaredes que eu utilicei as baldosas do chan para saber cales son as liñas de fondo máis as laterais e así facer un campo máis grande ou máis pequeno.
A continuación teredes que practicar o pase entre xogadores (que son os tapóns), o lanzamento a canastra (rollo de papel) e algo que me esquecín no vídeo: a conducción da bóla (o garavanzo). Unha vez practicadas estas habilidades xa estades en disposición de xogar partidos.
Colocade aos xogadores nas súas posicións: pívots (preto da canastra), aleros (un pouco máis afastados) e base (o máis alonxado da canastra) e seguide as regras que se explican no vídeo ou outras que marquedes vós.
Sesión 13. Deportes olímpicos: baloncesto
As regras principais a modo de resumo son:
1) Xogador que toque o garavanzo introducirá este dentro do seu tapón.
2) Mentres o garavanzo esté dentro dun tapón NON poderá ser interceptado por ningún xogador contrario.
3) Xogador con garavanzo terá 3 opcións: pase a outro xogador do seu equipo (con abertura de dedos como sae no vídeo), lanzamento a canastra ou conducción do garavanzo para aproximarse cara a canastra.
4) Cando o garavanzo sae por liña de fondo ou liña lateral sacará o equipo contrario.
5) Se un tapón choca con outro do outro equipo pitarase falta. Sacaremos desde a liña lateral.
6) Tanto o saque inicial como os saques desde liña lateral ou de fondo realizaranse cos dedos e a seguinte tirada será para un xogador do equipo que realiza o saque.
7) O garavanzo soamente pode ser interceptado cando non estea dentro de ningún tapón.
8) Cada vez que o garavanzo caia dentro do rollo de papel hixiénico considerarase canastra de 2 puntos. Se o lanzamento se fixo desde bastante lonxe (á altura da posición do base) serán 3 puntos.
Xa vedes que é un xogo complexo, pero espero que comprendades ben as regras xa que se é así garantízovos que pasaredes un momento moi divertido.
Aquí queda outro enlace no que se explican os aspectos máis destacados do baloncesto.
O seguinte vídeo subireino unha vez finalicen estas vacacións de Semana Santa. Mentres tanto practicade (sempre voluntariamente e se vos apetece) algúns dos xogos que vos fun ensinando ao longo destas semanas e se podedes enviádeme fotos, pequenos vídeos ou novas propostas ao correo electrónicoefnacasa@gmail.comOnte xa recibín cousiñas moi chulas dalgúns alumnos/as e fixéronme moita ilusión.
MOITA FORZA, ENERXÍA E ÁNIMO PARA ESTES DÍAS. QUÉROVOS.
Iniciamos aquí unha serie de vídeos cunha temática concreta: os deportes olímpicos. Xa me comentaron as profes de terceiro curso que vos mandaron uns retos olímpicos "caseiros" e que saíron cousas chulísimas. Unha mágoa que eu non poida velas, pero xa se me ocurriu unha idea para solucionar isto. Creei unha conta de correo electrónico específica para estes días de confinamento e todos os alumnos/as que queirades poderedes enviarme fotos ou pequenos vídeos sobre as vosas creacións relacionadas coa Educación Física, ben coas ideas que vos fun aportando nestas últimas semanas a través dos vídeos deste blog ou ben coas que foron froito da vosa imaxinación.
O que máis boto en falta estes días é o feito de non poder vervos nin poder falar con vós. Tampouco sei se os vídeos que estou a subir ao blog os estades vendo ou non; nin tampouco sei a vosa opinión acerca de si vos gustan ou non. Así que agradecería que me enviásedes cousiñas que estedes facendo estes días e que estén relacionadas coa materia de Educación Física. Para facilitarme o traballo poñédelle nome, apelidos e curso a todo o que enviedes.
Quédavos aquí a conta de correo electrónico: efnacasa@gmail.com
Así de fácil é construír un obxecto de xiro similar a unha buxaina. Como nos recreos moitos de vós, sobre todo os máis pequeniños, pasabades moito tempo xogando cos beyblade, aquí vos ensino algunhas habilidades que podedes practicar co que denominei "buxaina de andar por casa".
Hoxe traemos unha adaptación dun xogo ou xoguete, inventado por un galego alá polo ano 1937, e que causou a ledicia de nenos/as e de maiores: o futbolín.
Evidentemente aquí non imos usar mangos, xa que non creo que ninguén dispoña na súa casa dos mesmos; por iso imos utilizar outro material do cal si dispoñemos. Precisamos por tanto dunha mesa, uns cromos (cartas ou cartóns tamén servirían), un par de porterías e unha pelota feita cun papel. E logo, a imaxinación de cada un e cada unha de vós que permita crear novos elementos para vivir un ambiente máis real de partida de futbolín mediante a creación dun marcador, unha moeda para facer o saque inicial e todo canto se vos ocurra.
Retade aos vosos familiares e a ver quen amosa máis habilidade. Que empece a partida!!
Traemos para hoxe un novo xogo en familia. Partindo do mítico xogo da oca simplemente fixemos unhas adaptacións para traelo ao terreo da Educación Física. Teredes que superar un número de probas motrices nas diferentes casiñas polas que vaiades caendo ata chegar á casiña 26 que representa a victoria sobre o coronavirus.
Debaixo do vídeo tedes as probas e o taboleiro. Para copialo teredes que abrir un documento en branco en Word, picades na imaxe do taboleiro e cando estea seleccionada pulsades o botón dereito do rato, opción copiar e ides ao documento de Word, botón dereito do rato e opción pegar. Seguiredes este mesmo paso para copiar a folla das probas.
ÁNIMO!!
Sesión 9. O xogo da oca pero motriz.
Engado aquí un par de enlaces que atopei por internet e que tamén son xogos da Oca adaptados á E.F. Xa vedes que é un xogo que para estes días de confinamento estamos adaptando varios profes de Educación Física, dándolle o noso toque persoal.
Nesta última sesión desta semana volvemos tratar outro xogo popular e tradicional pero coa particularidade de que variaremos o terreo de xogo, é dicir, a forma e o tamaño das casiñas; serán ao voso gusto. Un conselliño: para os máis pequenos é preferible que as casiñas sexan máis grandes, pero os máis maiores poderedes aumentar a dificultade do xogo facendo as casiñas máis estreitas e pequenas. E outra cousiña; aos máis pequenos, como vos custará realizar saltos á pata coxa sen saírvos da casiña, podedes buscar outras variantes como saltar a pés xuntos, ou saltar apoiando os dous pés; de aí a importancia de que as súas casiñas sexan de maior tamaño.
Por certo, o vídeo de hoxe vai cunha dedicatoria especial. É para a xente do pobo no que nacín (Viana do Bolo) e moi especialmente para o mestre de Educación Física do CEIP Bibei da mencionada vila, quen está a levar a cabo estes días de confinamento un proxecto espectacular. Formou unha Comunidade (conxunto de persoas) na que xente de Viana e doutros lugares lle envían ideas (non só relacionadas coa Educación Física) e tamén retos, para compartir entre toda a Comunidade. Invitáronme a participar cos vídeos que estou gravando e aí seguiremos, entusiasmadísimo, compartindo ideas con moitísima xente coa finalidade de que este tempo que temos que estar pechados na casa o manteñamos ocupado con cousas que nos poden resultar divertidas e entretidas.
Saquemos conclusións deste tempo tan estraño que nos toca vivir e ogallá que todo isto nos sirva para construír un novo mundo, menos competitivo e individualista en favor dun mundo máis cooperativo e comunitario.
Hoxe vou presentarvos unha primicia, xa que este xogo posiblemente non o atoparedes en ningún lado. Trátase dunha adaptación do xogo "roubar a bandeira". Nestes días de confinamento a miña cabeza non para de pensar. Como vos dixen un montón de veces nas clases de Educación Física inventar un xogo é sinxelo, tan só hai que pensar nunhas regras para que ese xogo teña sentido. Logo, de vós depende que ese xogo sexa máis fácil ou máis complexo, pero o importante é que cando vos sintades aburridos lle dedes voltas ao voso "coco" e inventedes xogos para transformar ese aburrimento en diversión.
O xogo que vos presento hoxe é difícil, xa que aparte de ter moitas regras, éstas son algo complexas. Pero se non esquecedes a regra principal, e se ides adaptándovos coa asimilación das outras regras segundo avanza o xogo, seredes uns fenómenos e enseguida dominaredes o xogo. Explícovolo máis abaixo con máis detalle.
Estamos ante un xogo de estratexia, de solución múltiple. É dicir, que antes de realizar unha tirada debo de pensar previamente en cal pode ser a acción máis axeitada para cada momento. Lembrade, sobretodo os maiores, o que comentamos de percepción-decisión-execución.
A pesar de que as regras aparecen no vídeo acompañadas de imaxes, vou determe aquí en explicalas para que o vos sexa algo máis sinxelo aprender o xogo.
Regra principal: Cando os tapóns están no seu medio campo correspondente nunca poderán ser pillados.
Resto de regras:
- As tiradas van alternándose. Primeiro lanza unha persoa un tapón do seu equipo e a continuación tócalle o turno ao adversario. Así sucesivamente.
-Se un xogador/a (tapón) invade a metade do campo contrario, poderá ser pillado se o contrario (tapón doutra cor) impacta sobre el. Nese caso darédeslle a volta a ese tapón para indicar que foi pillado e que polo tanto deberá permanecer sempre inmóbil no sitio, a non ser que un xogador/a do seu equipo (tapón da mesma cor) impacte sobre el, momento no que quedará salvado.
- Cando un tapón saia fóra do campo de xogo, colocarase sempre na beira do lugar exacto por onde saíu.
- Cando un tapón roube a bandeira (tocar a bandeira co tapón), volverá a lanzar novamente para intentar cruzar coa bandeira cara o seu campo. Este é o único caso no que unha persona lanzará 2 veces seguidas. A bandeira colocarémola dentro do tapón, e soamente se considera a partida como gañada se esta non cae fóra do tapón no momento en que este regrese para o seu campo. Se caese cara fóra do tapón, este permanecería no lugar no que quedou e a bandeira haberá que levala novamente á esquina inicial, onde estaba ao inicio do xogo.
- Non está permitido colocar un tapón a modo de "perrito guardián" da bandeira. Respetade unha distancia considerable.
- Decidide con cantos tapóns xoga cada equipo. Que sexa sempre o mesmo número.
No vídeo de hoxe explico como elaborar un iogurcesto e algúns exemplos de habilidades para practicar. Invítovos a que as propoñades coma un reto familiar, é dicir, que irmáns, irmás, papás, avós… vos retedes para ver quen consegue ser máis habilidoso/a. Asegúrovos que están garantizadas unhas risas, que boa falla nos fan nestes días de estar confinados.
Trátase dun xogo que "engancha". Lémbrame moito a un que vos vin practicar infinidade de veces no colexio: o da botella de auga medio chea que hai que voltear no aire para que caia de pé.
A práctica destas habilidades permítenos desenrolar a coordinación óculo-manual (ollo-man) e óculo-pédica (ollo-pé).
Hoxe explícovos o xogo da ra, xogo popular e tradicional moi típico que seguramente sexa coñecido polos vosos pais/nais ou avós/avoas. As partidas consisten en lanzar alternativamente un total de 10 fichas co obxectivo de introducilas pola boca da ra ou nos outros orificios situados na mesa de xogo, intentando conseguir o máximo de puntuación en cada tirada. A partida finaliza unha vez pasadas 10 rondas ou tandas, resultando gañador/a o xogador/a que obteña máis puntos.
En primeiro lugar teredes que construír a vosa mesa de xogo coas súas puntuacións correspondentes. Como fichas poderedes empregar chapas, tapóns ou otros obxectos que se vos ocorran.
Facede tamén unha táboa para ir anotando a puntuación.
AFINADE A PUNTERÍA E... A XOGAR!!
Sesión 5. O xogo da ra.
Xogo da ra feito por un neno despois de ver o vídeo
Unha vez que vexades o vídeo comprobaredes o sinxelo e divertido que é ir enredando a la por diferentes obxectos para crear unha tea de araña. O seu tamaño dependerá do espazo que teñades en casa, pero tampouco fai falla moito sitio para elaborar unha tea de araña que vos permita practicar unha serie de habilidades e superar diversos retos que vos iredes marcando vós mesmos. Así que mans á obra e a divertirse. Arriba esa imaxinación.
Nesta sesión explícovos como realizar unha contrarreloxo individual de ciclismo con chapas ou tapóns. Primeiro teredes que debuxar as equipacións dos equipos profesionais que vós queirades. Neste enlace saen os equipos máis destacados para este 2020.
A continuación realizaredes o voso percorrido particular, cunha saída e unha meta. Intentade rexistrar e anotar nun caderno os tempos que fai cada ciclista para así poder facer unha clasificación final. Resultaravos máis divertido.
Usade o voso inxenio e creatividade para darlle o voso toque persoal. Esta actividade dá para discurrir moito. Incluso podedes realizar varias etapas con percorridos diferentes, cunha clasificación diaria de etapa e outra clasificación xeral. Así saberedes que postos van ocupando os diferentes ciclistas tal e como sucede no ciclismo profesional.
Por último indicarvos que ningunha das actividades, xogos ou habilidades que vos explico nestes vídeos son obrigatorias. Soamente son ideas, propostas... para poder pasar este tempo que estamos pechados na casa dunha maneira máis amena e estar, dalgunha maneira, algo máis activos. Se as facedes e practicades que sexa por diversión.
Na sesión de hoxe explico 3 xogos para realizar con cromos. Espero que vós inventedes outros novos. Lembrade o que dicimos sempre nas clases; que é moi sinxelo inventar un xogo. Tan só necesitamos poñer unhas regras.
Por certo. Reto para os máis futboler@s. Dos cromos que saen no vídeo, a ver se recoñecedes a dous entrenadores actuais de equipos de Primeira División. Un deles sae como xogador do Racing de Santander e o outro como xogador do Barça.
Iniciamos aquí unha serie de vídeos, que irei subindo co paso dos días, para que esta situación de excepcionalidade que estamos a vivir estes días pechados na casa os pasemos da mellor maneira posible, facendo algo de exercicio e movemento, e por suposto, pasando un momento agradable e divertido coas persoas que nos rodean.
Todos os vídeos terán un eixe central: aproveitar cousas que temos pola casa e darlles un novo uso (en moitos casos inimaxinables para nós) que nos permitan traballar diferentes habilidades motrices. Nesta primeira sesión utilizaremos unha garrafa de auga e a parte interior dun ovo Kinder.
Estade atent@s porque intentarei subir un vídeo cada día. ¡¡ÁNIMO!!
